ՀԱՐՑԱԶՐՈՅՑ "ՅՈՅՍ"-Ի ԱՐՏՕՆԱՏԷՐ ԼԵՒՈՆ ԱՀԱՐՈՆԵԱՆԻ ՀԵՏ


"ՅՈՅՍ"-Ը ԱՆՑԱՆԿԱԼԻ ԱՆՁԱՆՑ ՑԱՆԿ ՉՈՒՆԻ

 


-Ինչպէ՞ս էք գնահատում "Յոյս"-ի 100 համարները:
-Հպարտանում եմ, որ մեր "Յոյս"-ը կարողացել է իր 100 համարներով թէ՛ Իրանում եւ թէ՛ Հայաստանում իր տեղը բացել հասարակութեան մէջ: Անձամբ ականտես եմ, թէ ինչպէս, երբ մի քիչ "Յոյս"-ը ուշանում է, զանգահարում են ինձ եւ հարցնում են թէ "բա ի՞նչ էղաւ": Ուրեմն մարդիկ հետաքրքրւած են: Սա ինքնին մեզ համար խթան է հանդիսանում, որ շարունակենք մեր գործը եւ փորձենք բարելաւել մեր թերթը:
Իսկ թերթի պարսկերէն բաժինը աւելի հեշտ է կապ հաստատում թէ՛ մեր երիտասարդութեան հետ եւ թէ՛ պարսիկ հասարակութեան հետ: Պարսիկ ընկերներս շատ են հաւանում Հայաստանի, հայոց պատմութեան, Եղեռնի եւ այլնի մասին պարսկերէն յօդւածները:
Մեր համայնքում նման թերթեր, հրատարակութիւններ եւ այլն, դժբախտաբար գալիս են, փայլում են, յետոյ արագ խամրում ու հանգչում են: Բայց ես եւ "Յոյս"-ի աշխատակազմը, միչեւ հիմա պահել ենք թերթի որակը եւ կաշխատենք տարիներ շարունակ նոյն ուժգնութեամբ շարունակել:

-Եղե՞լ են պահեր, որ մտածէք դադարեցնել թերթի հրատարակութիւնը:
-Ո՛չ: Որովհետեւ ես "Լոյս"-ի ժամանակւանից ծանօթ էի թերթ հրատարակելու գործի հետ, եւ իմանում էի, որ կանոնաւոր թերթ հրատարակելը մեծ ծախսերի է նայում: Անգլերէն բառը գործ ածեմ, սա իմ հոբի-ն է: Հոբի այսինքն՝ քո իսկական աշխատանքի կողքին մի ուրիշ բանի նկատմամբ էլ սէր ունենաս եւ դրանով զբաղւես: Սա էլ իմ հոբի-ն է: Սիրում եմ գրքով, թերթով եւ հրատարակչութեան վերաբերող գործերով զբաղւել: Լուրջ մտածել եմ մի կերպ ծախսերը իջեցնելու մասին, բայց թերթը դադարեցնելու մասին` չեմ մտածել:

-Թերթի հրատարակութեան առաջին տարւայ ընթացքում, դուք աւելի ակտիւ մասնակցութիւն ունէիք դրա բովանդակութեան մէջ: Յատկապէս մեծ հետաքրքրութիւն ստեղծեց ձեր նամակը Արամ վեհափառին եւ դրա արձագանքը: Ինչո՞ւ այդ մակարդակի հարցեր այլեւս չէք արծարծում:
-Թողէք ձեզ վստահացնեմ, որ թէ "Լոյս" եւ թէ "Յոյս" պարբերականներում հրատարակւած յօդւածները, այդ թւում հէնց Վեհափառին ուղղւած իմ նամակը, իրենց ազդեցութիւնն են ունեցել մեր համայնքի կեանքում: Այս օրերին փոփոխութիւններ ենք նկատում պատգամաւորական ժողովում, թեմական խորհրդում եւ այլն, որոնցում այս թերթերը իրենց դերն են ունեցել: Օրինակ տեղեակ եմ, որ հէնց հիմա խօսւում է այստեղ դպրեվանք հիմնադրելու եւ հէնց տեղի երիտասարդներից քահանայ Վարդապետ դաստիարակելու մասին: Այդ նամակը աղմուկ շատ հանեց, բայց նպատակը աղմուկ հանելը չէր, այլ համայնքի նկատմամբ մտահոգութիւններ արտայայտելը:
Բայց, այո՛, ճիշտ էք, աւելի քիչ ակտիւութեանս վերաբերեալ: Դրա պատճառն այն է, որ նախ տարիքս է բարձրացել է, եւ գուցէ աւելի կարեւորն այն է, որ խիստ զբաղւած եմ եղել: Յուսով եմ շուտով "Յոյս"-ին աւելի կաշխատակցեմ:

-Մենք յաւակնել ենք եւ յաւակնում ենք, որ մեր թերթը կուսակցական չէ, յատուկ գաղափարախօսութեան չի պատկանում, այլ իր մէջ արտացոլում է համայնքի բոլոր հոսանքների տեսակէտները: Անցեալ տարւայ մեր խմբագրական կազմի փոփոխութիւններից յետոյ, Անդրանիկ Սիմոնեանի եւ Անդրանիկ Խեչումեանի խմբագրական կազմից հեռանալուց յետոյ, այս հարցն է ծագել որոշ մարդկանց մտքում, թէ արդեօք մենք ամենայնդէպս հաւատարի՞մ ենք վերոյիշեալ սկզբունքին եւ պատրա՞ստ ենք հրատարակել ցանկացած հեղինակի նիւթը՝ անկախ նրա գաղափարական պատկանելութիւնից:
-Հարիւր տոկոսով այդպէս է: Տեսէք, "Ալիք"-ը կուսակցական թերթ է, եթէ կուսակցութիւնը ցանկանում է մի բան գրւի, անկախ խմբագրի կարծիքից, դա պիտի տպւի: Ոչ մի կասկած, որ այդպէս է: Մերը չէ. մեր թերթի նպատակներից մէկն այն է, որ մարդիկ խօսեն եւ արտայայտւեն: Եթէ "Յոյս"-ն էլ դառնայ ողջ գովաբանութիւն ներկայ պայմանների, դա էլ ի՞նչ օգուտ կունենայ: Մենք քննադատութիւններ ունենք: Համայնքում եթէ մենք չքննադատենք ճիշտ չէ: ...

-Թոյլ տւէք աւելի պարզ ասել. մեզ հարցնում են, որ անցեալ տարւայ խմբագրական կազմի փոփոխութիւններից յետոյ, արդեօք ձեր մոտեցումն էլ փոխւե՞լ է, արդեօք դուք էլ հիմա անցանկալի մարդկանց ցա՞նկ ունէք, որոնց գրութիւնները չէք տպագրում:
-Չէ, նման բան չկայ: Հիմա էլ մեզ որեւէ յօդւած տան կը հրատարակենք, դրան պատասխան եղաւ, այն էլ կը հրատարակենք: Հէնց պարոն Սիմոնեանն էլ յօդւած տայ, կը տպենք: Իմ նպատակը "Լոյս"-ը եւ "Յոյս"-ը հրատարակելուց այն է եղել, որ այն պատերը որ մեր համայնքում մեր մէջ եղել է, քանդենք: Բարեկա՛մ, դու մի օր ձախ ես եղել, լաւ, Ռուսաստանն էլ ձախ է եղել: Հիմա չէ: Հիմա դարձել է համար մէկ կապիտալիստ: Ես չեմ ասում կապիտալիստն ամենալաւ բանն է, բայց կոմունիստական Ռուսաստանը քանդւել է, չէ՞: Ես չպիտի քեզ մեղադրեմ որովհետեւ դու ձախ ես եղել: Մենք մի փոքրիկ համայնք ունենք, եկէք այս համայնքը միասին կառավարենք: Ոչ մի կողմն է հասկացել այս, ոչ էլ միւսը: Տեսէք, Կարէն Դեմիրճեանն էլ ձախ էր, բայց ազնւութեան մարմնացում էր, ես նրա հետ շատ մօտ եմ եղել, շատ ազգանւէր մարդ էր: Իմ նպատակը այդ պատը մէջտեղից վերցնելն էր, բայց տեսնում եմ չի լինում:

-Վերջում բան կա՞յ աւելացնելու:
Խնդրանքս մեր ընթերցողներից այն է, որ եթէ գանգատ ունեն մեր նկատմամբ, գանգատւեն մեզ, իսկ եթէ սիրում են թերթը, թող այն տարածեն: Մեր երիտասարդներին ծանօթացնեն թերթի եւ ընթերցանութեան հետ: "Յոյս"-ը հրատարկելուց իմ նպատակը մշակութային աշխատանքն է, փող աշխատելը չէ:

 

 

Յոյս թիւ 100

15 Յունիս 2011